Thursday, July 25, 2019

اہل بیت سے مراد کون ہیں؟

اہل بیت سے مراد کون ہیں؟

نبی کریم ﷺ کے اہل بیت کے بارے میں صحیح بات یہ ہے کہ اس سے مراد آپ کے وہ رشتہ دار ہیں جن پر صدقہ حرام ہے۔ یعنی آپ کی ازواج مطہرات اور اولاد نیز عبدالمطلب کی نسل میں سے ہر مسلمان مرد و عورت جنھیں بنو ہاشم کہا جاتا ہے۔ علامہ ابن حزم رحمہ اللہ فرماتے ہیں:
ولد هاشم بن عبد مناف: شيبة، وهو عبد المطلب، وفيه العمود والشرف، ولم يبق لهاشم عقب إلا من عبد المطلب فقط
”ہاشم بن عبد مناف کے گھر شیبہ پیدا ہوئے جنہیں عبد المطلب کہا جانے لگا۔ ہاشم کے شرف و مرتبہ کے وہی وارث ہوئے اور ان کے علاوہ کسی اور بیٹے سے ہاشم کی نسل نہیں چلی۔“
(جمھرۃ انساب العرب: 14)

اور عبد المطلب کی نسل کے بارے میں علامہ ابن حزم رحمہ اللہ کی کتاب جمھرۃ انساب العرب: 14-15، ابن قدامہ رحمہ اللہ کی کتاب التبیین فی انساب القرشیین: 76، علامہ ابن تیمیہ رحمہ اللہ کی منہاج السنۃ: 7/304-305 اور حافظ ابن حجر رحمہ اللہ کی فتح الباری: 7/78-79 کا مطالعہ کیا جائے۔
اس بات کی دلیل کہ ”آپ کے چاچاؤں کی نسل بھی اہل بیت میں داخل ہے“ صحیح مسلم کی وہ حدیث ہے جو عبد المطلب بن ربیعہ بن حارث بن عبد المطلب رضی اللہ عنہ سے منقول ہے کہ میں اور فضل بن عباس رضی اللہ عنہما نبی کریم ﷺ کی خدمت میں یہ درخواست لے کر حاضر ہوئے کہ آپ ہمیں صدقہ کی وصولی پر مقرر فرما دیں تاکہ ہم اس کام کی تنخواہ سے اپنی شادی کا سامان کر سکیں۔ آپ ﷺ نے فرمایا:
إِنَّ الصَّدَقَةَ لَا تَنْبَغِي لِآلِ مُحَمَّدٍ، إِنَّمَا هِيَ أَوْسَاخُ النَّاسِ
”آل محمد ﷺ کے لئے صدقہ حلال نہیں، یہ تو لوگوں کی میل کچیل ہے۔“
(صحیح مسلم: 1072)

پھر آپ نے خمس کے مال سے ان کی شادی کرنے کا حکم دیا۔ امام شافعی اور امام احمد رحمہما اللہ جیسے بعض اہل علم نے صدقہ کی حرمت کے مسئلہ میں بنو ہاشم کے ساتھ بنو مطلب بن عبد مناف کو بھی شامل کیا ہے۔ کیونکہ نبی اکرم ﷺ نے خمس کے خمس سے ان کو بھی حصہ دیا تھا جیسا کہ صحیح بخاری کی حدیث سے معلوم ہوتا ہے، جبیر بن مطعم رضی اللہ عنہ نے بیان کیا ہے کہ ”نبی کریم ﷺ نے بنو ہاشم اور بنو مطلب کو خمس سے حصہ دیا لیکن عبد شمس اور نوفل کی اولاد کو کچھ نہ دیا۔ (حالانکہ ہاشم، مطلب، عبد شمس اور نوفل آپس میں بھائی ہیں) اور وجہ یہ بتائی کہ بنو ہاشم اور بنو مطلب ایک ہیں۔“
(صحیح بخاری: 3140)

آپ کی ازواج مطہرات کے اہل بیت میں سے ہونے کی دلیل اللہ ﷻ کا یہ فرمان ہے:
وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَى وَأَقِمْنَ الصَّلَاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا[33] وَاذْكُرْنَ مَا يُتْلَى فِي بُيُوتِكُنَّ مِنْ آيَاتِ اللَّهِ وَالْحِكْمَةِ إِنَّ اللَّهَ كَانَ لَطِيفًا خَبِيرًا[34]
”اور اپنے گھروں میں قرار سے رہو اور قدیم جاہلیت کے زمانے کی طرح اپنے بناؤ کا اظہار نہ کرو اور نماز ادا کرتی رہو اور زکوٰة دیتی رہو اور اللہ اور اس کے رسول کی اطاعت گزاری کرو۔ اللہ ﷻ یہی چاہتا ہے کہ اے نبی کی گھر والیو! تم سے وه (ہر قسم کی) گندگی کو دور کردے اور تمہیں خوب پاک کردے۔ [33] اور تمہارے گھروں میں اللہ کی جو آیتیں اور رسول کی احادیث پڑھی جاتی ہیں ان کا ذکر کرتی رہو، یقیناً اللہ ﷻ لطف کرنے واﻻ خبردار ہے۔ [34]“
(سورۃ الاحزاب: 33-34)

یہ آیت مبارکہ قطعی طور پر دلالت کرتی ہے کہ ازواج مطہرات اہل بیت میں داخل ہیں کیونکہ اس سے ما قبل و ما بعد کی آیات میں انہیں سے خطاب ہے۔ صحیح مسلم کی حدیث کو اس کے منافی خیال نہ کیا جائے جو کہ حضرت عائشہ رضی اللہ عنہا سے مروی ہے:
خَرَجَ النَّبِيُّ صَلَّى اللَّهُ عَلَيْهِ وَسَلَّمَ غَدَاةً، وَعَلَيْهِ مِرْطٌ مُرَحَّلٌ مِنْ شَعْرٍ أَسْوَدَ، فَجَاءَ الْحَسَنُ بْنُ عَلِيٍّ، فَأَدْخَلَهُ، ثُمَّ جَاءَ الْحُسَيْنُ فَدَخَلَ مَعَهُ، ثُمَّ جَاءَتْ فَاطِمَةُ فَأَدْخَلَهَا، ثُمَّ جَاءَ عَلِيٌّ فَأَدْخَلَهُ، ثُمَّ قَالَ: إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا
”رسول اللہ ﷺ صبح کو نکلے اور آپ ﷺ ایک چادر اوڑھے ہوئے تھے جس پر کجاووں کی صورتیں یا ہانڈیوں کی صورتیں بنی ہوئی تھیں۔ اتنے میں حسن رضی اللہ عنہ آئے تو آپ ﷺ نے ان کو اس چادر کے اندر کر لیا۔ پھر حسین رضی اللہ عنہ آئے تو ان کو بھی اس میں داخل کر لیا۔ پھر فاطمہ رضی اللہ عنہا آئیں تو ان کو بھی انہیں کے ساتھ شامل کر لیا پھر علی رضی اللہ عنہ آئے تو ان کو بھی شامل کر کے فرمایا کہ ”اللہ ﷻ چاہتا ہے کہ تم سے ناپاکی کو دور کرے اور تم کو پاک کرے اے گھر والو۔‘‘ (الاحزاب: 33)۔
(صحیح مسلم: 2424)

کیونکہ اس آیت میں صراحتاً خطاب ازواج مطہرات کو ہے لہذا وہ تو قطعا داخل ہیں، البتہ اس حدیث سے معلوم ہوا کہ علی، فاطمہ، حسن اور حسین رضی اللہ عنہم بھی ان کے ساتھ اہل بیت میں داخل ہیں، اس حدیث میں ان چار حضرات کے ذکر کا یہ مطلب نہیں کہ دوسرے رشتہ دار اہل بیت میں داخل نہیں بلکہ اس سے تو یہ معلوم ہوتا ہے کہ یہ چاروں آپ کے گہرے رشتے دار ہیں۔ اس کی ایک اور مثال آپ ملاحظہ کرنا چاہیں تو وہ یوں ہے:
لَمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ
”وہ مسجد جس کی بنیاد ابتدا ہی سے تقویٰ اور خلوص پر رکھی گئی۔“
(سورۃ التوبۃ: 108)

یہ فرمان الہی مسجد قبا کے بارے میں ہے۔ جبکہ صحیح مسلم کی حدیث سے معلوم ہوتا ہے کہ اس مسجد سے مراد مسجد نبوی ہے۔ (صحیح مسلم: 1398) گویا دونوں مسجدیں اس فرمان کے مصداق ہیں۔ کیونکہ دونوں کی بنیاد نبی اکرم ﷺ نے اپنے دست مبارک سے رکھی۔ علامہ ابن تیمیہ رحمہ اللہ نے یہ مثال اپنے رسالہ میں ذکر فرمائی ہے۔ (فضل اھل البیت و حقوقھم: 20-21) آپ کی ازواج مطہرات لفظ ”آل“ کے تحت داخل ہیں کیونکہ آپ ﷺ کا فرمان ہے:
أَنَّ الصَّدَقَةَ لَا تَحِلُّ لِآلِ مُحَمَّدٍ
”صدقہ (و زکوۃ) آل محمد کے لئے حلال نہیں۔“
(مسند احمد: 7758)

اس لئے ان کو خمس سے حصہ دیا جاتا تھا۔ نیز مسند ابن ابی شیبہ میں حضرت ابن ابی ملیکہ سے صحیح سند کے ساتھ مروی ہے:
أَنَّ خَالِدَ بْنَ سَعِيدٍ بَعَثَ إلَى عَائِشَةَ بِبَقَرَةٍ مِنْ الصَّدَقَةِ فَرَدَّتْهَا وَقَالَتْ إنَّا آلَ مُحَمَّدٍ صَلَّى الله عَلَيْهِ وَسَلَّمَ لَا تَحِلُّ لَنَا الصَّدَقَةُ
”خالد بن سعید نے عائشہ رضی اللہ عنہا کے گھر صدقہ کی ایک گائے بھیج دی۔ عائشہ رضی اللہ عنہا نے اسے واپس لوٹایا اور فرمایا: ہم آل محمد کے لئے صدقہ حلال نہیں۔“
(المصنف لابن ابی شیبۃ: 10708)

علامہ ابن قیم رحمہ اللہ اس مسلک کے قائلین کا ذکر کرتے ہوئے لکھتے ہیں:
”یہ لوگ کہتے ہیں کہ بیویاں بھی آل میں داخل ہوتی ہیں خصوصا ازواج مطہرات آل محمد (ﷺ) میں داخل ہیں، کیونکہ زوجیت والا رشتہ بھی تو نسب جیسا ہے۔ ازواج مطہرات کا رشتہ نبی اکرم ﷺ سے منقطع نہیں ہوا تبھی تو وہ آپ کی زندگی میں آپ کی وفات کے بعد بھی دوسرے مردوں پر حرام ہیں۔ وہ دنیا میں بھی آپ کی بیویاں ہیں اور آخرت میں بھی آپ کی بیویاں ہوں گی۔ لہذا ان کا نبی کریم ﷺ کے ساتھ رشتہ نسب کی طرح قائم و دائم ہے۔ آپ نے درود میں ان کو صراحتاً شامل فرمایا ہے، اس لئے صحیح بات یہی ہے کہ صدقہ ازواج مطہرات پر بھی حرام ہے کیونکہ یہ لوگوں کی میل کچیل ہے اور اللہ ﷻ نے آپ کی ذات اور آپ کی آل کو انسانوں کی اس میل کچیل سے بچا کر رکھا ہے۔ امام احمد رحمہ اللہ کا بھی یہی مسلک ہے۔ پھر تعجب کی بات ہے کہ اگر ازواج مطہرات آپ کے مندرجہ ذیل فرامین میں داخل ہیں:
اللَّهُمَّ اجْعَلْ رِزْقَ آلِ مُحَمَّدٍ قُوتًا
”اے اللہ آل محمد ﷺ کو صرف ضرورت کی حد تک رزق دے۔“
(صحیح مسلم: 1055)

عائشہ رضی اللہ عنہا نے فرمایا:
مَا شَبِعَ آلُ مُحَمَّدٍ صَلَّى اللَّهُ عَلَيْهِ وَسَلَّمَ مِنْ خُبْزِ بُرٍّ مَأْدُومٍ، ثَلَاثَةَ أَيَّامٍ حَتَّى لَحِقَ بِالله
”آل رسول ﷺ کبھی پے در پے تین دن تک سالن کے ساتھ گیہوں کی روٹی نہیں کھا سکے یہاں تک کہ نبی کریم ﷺ اللہ سے جا ملے۔“
(صحیح بخاری: 6687، صحیح مسلم: 2970)

اسی طرح ازواج مطہرات درود میں بھی داخل ہیں، تو کیا وجہ ہے کہ وہ آپ کے اس فرمان میں داخل نہیں؟
أَنَّ الصَّدَقَةَ لَا تَحِلُّ لِآلِ مُحَمَّدٍ
”صدقہ (و زکوۃ) آل محمد کے لئے حلال نہیں۔“
(مسند احمد: 7758)

حالانکہ صدقہ لوگوں کی میل کچیل ہے۔ ازواج مطہرات کو تو اس سے بچانے اور دور رکھنے کی بہت ضرورت تھی۔

شبہ: اگر کہا جائے کہ اگر صدقہ ازواج مطہرات پر حرام ہوتا تو ان کے غلاموں اور لونڈیوں پر بھی حرام ہونا چاہئے تھا جس طرح بنو ہاشم کے غلاموں اور لونڈیوں پر تھا، حالانکہ صحیح بخاری میں روایت ہے کہ حضرت بریرہ رضی اللہ عنہا کو صدقہ کا گوشت بھیجا گیا اور انہوں نے کھایا۔ نبی کریم ﷺ نے انہیں منع نہیں کیا، جبکہ بریرہ رضی اللہ عنہا عائشہ رضی اللہ عنہا کی آزاد کردہ لونڈی تھیں۔
جواب: درحقیقت اسی بات سے ان لوگوں کو اشتباہ ہوا جنہوں نے ازواج مطہرات کے لئے صدقے کا استعمال جائز کہا ہے۔ اس اشتباہ کا جواب یہ ہے کہ ازواج مطہرات پر صدقے کی حرمت ذاتی نہیں، بلکہ نبی کریم ﷺ کی وجہ سے ہے ورنہ آپ کے ساتھ نکاح سے پہلے ان پر صدقہ حرام نہیں تھا، اس لئے یہ حرمت ان کے غلاموں پر لاگو نہ ہوگی۔ جبکہ بنو ہاشم پر صدقے کی حرمت ذاتی ہے اس لئے یہ ان کے غلاموں پر بھی لاگو ہوگی۔
اس بحث سے یہ بات واضح ہوگئی کہ ازواج مطہرات اہل بیت میں داخل ہیں، کیونکہ اہل بیت والی آیت سے ما قبل چند آیات اور بعد والی آیت میں خطاب ازواج مطہرات سے ہے لہذا ان کو اہل بیت سے نکالنا ممکن نہیں۔
(جلاء الافہام: 113-114)

بنو ہاشم کے غلاموں پر صدقے کی حرمت کی دلیل یہ حدیث ہے:
أَنَّ النَّبِيَّ صَلَّى اللَّهُ عَلَيْهِ وَسَلَّمَ بَعَثَ رَجُلًا عَلَى الصَّدَقَةِ مِنْ بَنِي مَخْزُومٍ، فَقَالَ لِأَبِي رَافِعٍ: اصْحَبْنِي؛ فَإِنَّكَ تُصِيبُ مِنْهَا. قَالَ: حَتَّى آتِيَ النَّبِيَّ صَلَّى اللَّهُ عَلَيْهِ وَسَلَّمَ فَأَسْأَلَهُ. فَأَتَاهُ فَسَأَلَهُ، فَقَالَ: مَوْلَى الْقَوْمِ مِنْ أَنْفُسِهِمْ، وَإِنَّا لَا تَحِلُّ لَنَا الصَّدَقَةُ
”نبی اکرم ﷺ نے بنی مخزوم کے ایک شخص کو صدقہ وصول کرنے کے لئے بھیجا، اس نے ابو رافع سے کہا: میرے ساتھ چلو اس میں سے کچھ تمہیں بھی مل جائے گا، انہوں نے کہا: میں رسول ﷺ کے پاس جا کر پوچھ لوں، چنانچہ وہ آپ کے پاس آئے اور دریافت کیا تو آپ ﷺ نے فرمایا: قوم کا غلام انہیں میں سے ہوتا ہے اور ہمارے لئے صدقہ لینا حلال نہیں۔“
(سنن ابی داؤد: 1650، سنن الترمذی: 657)

کتاب: اہل سنت کے نزدیک اہل بیت کا مقام و مرتبہ (13-19)۔ مؤلفہ: دکتور عبد المحسن بن حمد العباد البدر حفظہ اللہ۔ مترجم: شیخ الحدیث حافظ محمد امین حفظہ اللہ
یونیکوڈ: عمر اثری

Monday, January 14, 2019

فضل اللہ چشتی صاحب کے بہتان کا جواب

فضل اللہ چشتی صاحب کے بہتان کا جواب

تحریر: عمر اثری سنابلی

ایک ویڈیو بھیج کر اس کا جواب طلب کیا گیا ہے جسمیں ایک بریلوی عالم فضل اللہ چشتی صاحب نے اہل حدیثوں پر تحریف جیسے سنگین الزامات لگائے ہیں۔ آئیے اس ویڈیو میں کئے گئے اعتراضات پر نظر ڈالتے ہیں اور ان کی حقیقت جاننے کی کوشش کرتے ہیں۔ 
پہلا اعتراض: چشتی صاحب کہتے ہیں کہ: 
”امام صابونی رحمہ اللہ اپنی کتاب ”عقیدۃ السلف“ (جس میں انہوں نے اسلام کے شروع کے تین سو سال کے بزرگوں کے عقائد درج کئے ہیں) میں لکھتے ہیں: 
باب زيارة قبور النبي صلى الله عليه وسلم
یعنی انھوں نے نبی ﷺ کی قبر مبارک پر جانے کے متعلق باب باندھا ہے۔ (چشتی صاحب آگے کہتے ہیں) اور یہی ہمارا عقیدہ ہے اور دلیل میں حدیث «من زار قبري، وجبت له شفاعتي» پیش کی اور کہا کہ امام بزار نے اس روایت کو صحیح کہا ہے۔ اس کے بعد چشتی صاحب نے کہا کہ اہل حدیثوں نے ”دار السلام“ سے جب اس کتاب کو چھاپا تو اس میں ”قبر“ کی جگہ ”مسجد“ کا لفظ داخل کر دیا۔“
جواب: مجھ کو اب تک ”عقیدۃ السلف للصابونی“ مطبوعہ دار السلام نہیں مل سکی۔ اور ان صاحب نے خود اپنی کتاب ”تحریفات“ میں جو اسکین اميج لگایا ہے وہ ”دار السلام“ کا نہیں ہے بلکہ ان کے بقول (کیونکہ اسکین میں طباعت کا ذکر نہیں ہے) وہ ”دار التوحید، کویت“ کی طبع ہے۔ میں اس طبع کو تلاش کے باوجود حاصل نہیں کرسکا لہذا کتاب کی طباعت اور محقق کے متعلق زیادہ علم نہیں، البتہ: 
➊ ممکن ہے کہ محقق کتاب کو کسی مخطوطہ میں ”مسجد“ کا لفظ مل گیا ہو۔ 
➋ یہی کتاب دوسرے علماء کی تحقیق سے بھی چھپی ہے  لیکن ان میں ”مسجد“ کا لفظ نہیں ہے بلکہ ”قبر“ کا لفظ ہے۔ لہذا کسی ایک کے عمل سے تمام اہل حدیثوں کو مطعون کرنا اور ان پر تحریف کا الزام لگانا چہ معنی دارد؟ خاص طور سے جس طباعت میں لفظ ”مسجد“ ہے وہ قدیم ہے اس کے بعد تمام طباعتوں میں ”قبر“ کا لفظ ہے۔
➌ ہمارا عقیدہ
«لاَ تَشُدُّوا الرِّحَالَ إِلاَّ إِلَى ثَلاَثَةِ مَسَاجِدَ مَسْجِدِي هَذَا وَالْمَسْجِدِ الْحَرَامِ وَالْمَسْجِدِ الأَقْصَى»
”نہ ‌باندھو ‌تم ‌كجاووں ‌كو (یعنی ‌سفر ‌نہ ‌كرو) ‌مگر ‌تین ‌مسجدوں ‌كی ‌طرف ‌ایک ‌میری ‌یہ ‌مسجد ‌اور ‌دوسری ‌مسجد الحرام ‌اور ‌تیسری ‌مسجد ‌اقصی۔“
(صحيح مسلم حديث نمبر: 728)
جیسے  نصوص پر مشتمل ہے کسی کے عمل یا تحریف پر نہیں۔ 

◈ اب یہاں سوال یہ پیدا ہوتا ہے کہ امام صابونی رحمہ اللہ نے لفظ ”قبر“ کیوں ذکر کیا ہے کیا ان کا یہی عقیدہ ہے؟ یا یہ کہ پہلی تین صدی کے علماء کا یہی عقیدہ ہے جیسا کہ چشتی صاحب نے کہا؟
◄ اس کے جواب میں عرض ہے کہ: 
① امام صابونی رحمہ اللہ نے کسی کا عقیدہ نہیں ذکر کیا ہے اور نہ ہی کوئی باب باندھا ہے بلکہ سبب تالیف میں اس بات کو انھوں نے ذکر کیا ہے۔ ان کے الفاظ ہیں: 
«فإني لما وردت آمد طبرستان وبلاد جيلان متوجها إلى بيت الله الحرام وزيارة قبر نبيه محمد صلى الله عليه وعلى آله وأصحابه الكرام»
”جب میں بیت اللہ اور قبر نبوی ﷺ کی زیارت کے قصد سے (راستہ میں) طبرستان کے شہر آمل اور جیلان آیا۔“
(عقیدۃ السلف واصحاب الحدیث ط دار العصامۃ: 158)

② ابن تیمیہ رحمہ اللہ نے ذکر کیا ہے کہ بعض علماء قبر رسول (ﷺ) کی زیارت بول کر مسجد نبوی کی زیارت مراد لیتے تھے۔
(مجموع الفتاوی: 27/246) 
البتہ اس طرح کہنے کو بھی علماء نے ناپسند کیا ہے۔
(مجموع الفتاوی: 27/245) 

❀ اب یہاں چشتی صاحب سے میرا سوال ہے کہ اپنے عقیدے کے اثبات کے لئے جو زور آپ لگا رہے ہیں کیا اس طرح کا زور آپ امام صابونی رحمہ اللہ کی کتاب میں موجود دوسرے عقائد (جیسے ایمان کی تعریف، اس میں کمی و زیادتی اور اسی طرح استواء علی العرش) کو اختیار کرنے میں لگا رہے ہیں؟ امام صابونی رحمہ اللہ نے اپنا ایک عمل ذکر کیا تو آپ نے اس کو پہلی تین صدی ہجری کے علماء کا عقیدہ قرار دے کر اس کو اپنا عقیدہ کہا لیکن علمائے سلف کے جو عقائد انہوں نے اپنی کتاب میں ذکر کئے ہیں ان سے آپ کوسوں دور نظر آتے ہیں؟ ایسا کیوں ہے؟

✿ اور جو حدیث چشتی صاحب نے نبی اکرم ﷺ کی قبر کی زیارت کے لئے بطور دلیل پیش کی ہے وہ بایں الفاظ مروی ہے: 
مَنْ زَارَ قَبْرِي وَجَبَتْ لَهُ شَفَاعَتِي
”جس نے میری قبر کی زیارت کی، اس کے لئے میری شفاعت واجب ہو گئی۔“
(سنن الدارقطني ط الرسالۃ: 3/334، حدیث نمبر: 2695، شعب الإيمان للبيهقي ط الرشد: 6/51، حدیث نمبر: 3862)

❀ تبصرہ: اس کی سند ”ضعیف“ ہے، اس پر درج ذیل محدثین نے کلام کیا ہے: 
⓵ امام ابن خزیمہ رحمہ اللہ فرماتے ہیں:
«فإن فى القلب منه…………….أنا أبرا من عهدة هذا الخبر»
”میرے دل میں اس کے بارے میں خلش ہے…………میں اس کی ذمہ داری سے بری ہوں۔“
(لسان الميزان لابن حجر ط مکتب المطبوعات الاسلامیۃ: 228/8)

◈ نیز اس روایت کو امام صاحب نے ”منکر“ بھی قرار دیا ہے۔
(حوالہ سابق)

◈ حافظ سخاوی رحمہ اللہ فرماتے ہیں:
«وهو فى صحيح ابن خزيمة وأشار الى تضعيفه»
”یہ روایت صحیح ابن خزیمہ میں ہے، اور امام صاحب (ابن خزیمہ) نے اس کے ضعیف ہونے کی طرف اشارہ فرمایا ہے۔“
(المقاصد الحسنة فى بيان كثير من الأحاديث المشتهرة على الألسنة ط دار الکتاب العربی: 1/647، حدیث نمبر: 1125)

⓶ امام عقیلی رحمہ اللہ فرماتے ہیں:
فيها لين
”اس میں کمزوری ہے۔“ 
(الضعفاء الكبير للعقیلی ط دار الکتب العلمیۃ: 170/4)

⓷ امام بیہقی رحمہ اللہ فرماتے ہیں:
«فهو منكر»
”یہ روایت منکر ہے۔“
(شعب الإيمان للبيهقي ط الرشد: 6/51)

⓸ حافظ ذہبی رحمہ اللہ فرماتے ہیں: 
«وهو حديث منكر»
”یہ حدیث منکر ہے۔“ 
(تاريخ الاسلام للذھبی ط دار الغرب الاسلامی: 4/663)

⓹ حافظ ابن عبدالہادی رحمہ اللہ لکھتے ہیں:
«وهو مع هذا حديث غير صحيح ولا ثابت، بل هو حديث منكر عند أئمة هذا الشأن ضعيف الاسناد عندهم، لايقوم بمثله حجة، ولا يعتمد على مثله عند الاحتجاج الا الضعفاء في هذا العلم»
”اس کے ساتھ ساتھ یہ حدیث نہ صحیح ہے نہ ثابت۔ بلکہ یہ تو فن حدیث کے ائمہ کے نزديک منکر اور ضعیف الاسناد روایت ہے۔ اس جیسی روایت دلیل بننے کے لائق نہیں ہوتی۔ علم حدیث میں ناپختہ کار لوگ ہی ایسی روایات کو اپنی دلیل بناتے ہیں۔“ 
(الصارم المنكي فى الرد على السبكي ط الریان: 1/21)

⓺ حافظ ابن حجر رحمہ اللہ فرماتے ہیں:
«ولا يصح فى هذا الباب شیء»
”اس باب میں کچھ بھی ثابت نہیں۔“ 
(التلخيص الحبير ط العلمیۃ: 569/2)

اب رہا مسئلہ امام بزار کی تصحیح کا تو مجھے ان کی تصحیح نہیں مل سکی اور اگر انہوں نے صحیح کہا بھی ہو تو اتنے سارے محدثین کے مقابلہ میں ان کی بات قبول نہیں کی جائے گی۔ 

دوسرا اعتراض: چشتی صاحب کہتے ہیں کہ:
”اہل حدیثوں نے سنن ترمذی کا انگریزی نسخہ جو ”دار السلام“ سے چھاپا ہے اس میں تحریف کر دی اور چونکہ ان کو عربی سے کوئی سروکار نہیں ہوتا لہذا انہوں نے ترجمہ میں گڑبڑ کردی۔ اصل ترجمہ تھا:
”قبر سے سورہ ملک پڑھنے کی آواز آئی“ 
لیکن انہوں نے اس کو بدل دیا اور ترجمہ کیا: 
”صحابی نے خیمہ لگا کر سورہ ملک پڑھی“ 
جواب: جس روایت کی طرف چشتی صاحب نے اشارہ کیا ہے وہ ان الفاظ کے ساتھ مروی ہے: 
«عَنِ ابْنِ عَبَّاسٍ، قَالَ : ضَرَبَ بَعْضُ أَصْحَابِ النَّبِيِّ صَلَّى اللَّهُ عَلَيْهِ وَسَلَّمَ خِبَاءَهُ عَلَى قَبْرٍ ، وَهُوَ لَا يَحْسِبُ أَنَّهُ قَبْرٌ ، فَإِذَا فِيهِ إِنْسَانٌ يَقْرَأُ سُورَةَ تَبَارَكَ الَّذِي بِيَدِهِ الْمُلْكُ حَتَّى خَتَمَهَا ، فَأَتَى النَّبِيَّ صَلَّى اللَّهُ عَلَيْهِ وَسَلَّمَ ، فَقَالَ : يَا رَسُولَ اللَّهِ ، إِنِّي ضَرَبْتُ خِبَائِي عَلَى قَبْرٍ ، وَأَنَا لَا أَحْسِبُ أَنَّهُ قَبْرٌ فَإِذَا فِيهِ إِنْسَانٌ يَقْرَأُ سُورَةَ تَبَارَكَ الْمُلْكُ حَتَّى خَتَمَهَا ، فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: هِيَ الْمَانِعَةُ هِيَ الْمُنْجِيَةُ تُنْجِيهِ مِنْ عَذَابِ الْقَبْرِ»
”عبداللہ بن عباس رضی اللہ عنہما سے روایت ہے کہ صحابہ میں سے کسی نے اپنا خیمہ ایک قبر پر نصب کر دیا اور انہیں معلوم نہیں ہوا کہ وہاں قبر ہے، (انہوں نے آواز سنی) اس قبر میں کوئی انسان سورہ «تبارك الذي بيده الملك» پڑھ رہا تھا، یہاں تک کہ اس نے پوری سورہ ختم کر دی۔ وہ صحابی نبی اکرم ﷺ کے پاس آئے پھر آپ سے کہا: اے اللہ کے رسول! میں نے اپنا خیمہ ایک قبر پر نصب کر دیا، مجھے گمان نہیں تھا کہ اس جگہ پر قبر ہے۔ مگر اچانک کیا سنتا ہوں کہ اس جگہ ایک انسان سورہ «تبارك الملك» پڑھ رہا ہے اور پڑھتے ہوئے اس نے پوری سورہ ختم کر دی۔ آپ نے فرمایا: «هي المانعة» ”یہ سورۃ مانعہ ہے، یہ نجات دینے والی ہے، اپنے پڑھنے والے کو عذاب قبر سے بچاتی ہے۔“
(سنن ترمذی: 2890، قال الشيخ الألباني: ضعيف، وإنما يصح منه قوله: هي المانعة..... ، الصحيحة: 1140، ضعيف الجامع الصغير: 6101، المشكاة: 2154)
اس حدیث کے انگریزی ترجمہ میں تحریف کا الزام درحقیقت چشتی صاحب کے متعصب ہونے کی دلیل ہے اور ان کے اس بودے اعتراض پر عرض ہے کہ:
➊ ترمذی کی زیر بحث روایت ”ضعیف“ ہے۔ کیونکہ اس کی سند میں ”یحیی بن عمرو“ ضعیف راوی ہیں۔ چنانچہ کئی علماء نے اس روایت کو ضعیف قرار دیا ہے۔ البتہ اس روایت کا آخری ٹکڑا (هي المانعة) شواہد کی بنا پر صحیح ہے۔ 
خلاصہ کلام یہ کہ یہ روایت ضعیف ہے۔ لہذا ”دار السلام“ والوں کو اس میں تحریف کی کیا ضرورت پیش آگئی۔ 
➋ اگر ”دار السلام“ والوں کو تحریف کرنی ہی تھی تو صرف انگریزی ترجمہ میں ہی کیوں کی؟ عربی الفاظ میں تحریف کیوں نہیں کی؟ چلئے عربی چھوڑیں ”دار السلام“ سے مطبوع اردو ترجمہ میں تحریف کیوں نہیں ہے؟ ان سب باتوں کا چشتی صاحب کے پاس یقینا کوئی جواب نہیں ہے کیوں کہ وہ بس دشمنی میں اول فول بک رہے ہیں۔ 

تیسرا اعتراض: اس کے بعد چشتی صاحب نے ”القول البدیع“ میں بھی ایک تحریف کا الزام لگایا ہے۔ 
جواب: ہم اس پر کچھ تبصرہ نہیں کریں گے کیونکہ یہ تحریف کی گاج چشتی صاحب نے دیوبندیوں پر گرائی ہے کہ انھوں نے تحریف کی ہے۔ (جیسا کہ انہوں نے اپنی کتاب ”تحریفات“ میں ذکر کیا ہے) البتہ ہم ان کی پیش کردہ روایت کے متعلق  گفتگو کریں گے۔ امام سخاوی رحمہ اللہ نے روایت ان الفاظ میں نقل کی ہے: 
«عن سهل بن سعد رضي الله عنه قال جاء رجل إلى النبي صلى الله عليه وسلم فشكا إليه الفقر وضيق العيش او المعاش فقال له رسول الله - صلى الله عليه وسلم - إذا دخلت منزلك فسلم إن كان فيه أحد أو لم يكن فيه أحد ثم سلم علي واقرأ «قل هو الله أحد» مرة واحدة ففعل الرجل فأدر الله عليه الرزق حتى أفاض على جيرانه وقراباته»
”سہل بن سعد ساعدی رضی اللہ عنہ سے روایت ہے کہ ایک آدمی نبی اکرم ﷺ کے پاس آیا اور فقر و فاقہ اور زندگی یا معاش کی تنگی کی شکایت کی۔ آپ ﷺ نے ان سے فرمایا: جب تم اپنے گھر میں داخل ہو اور گھر میں کوئی ہو یا نا ہو تو سلام کرو، پھر مجھ پر سلام بھیجو اور ایک مرتبہ قل ھو اللہ احد پڑھو ، پس اس آدمی نے ایسا ہی کیا تو اللہ ﷻ نے اس کے رزق میں زیادتی پیدا کر دی یہاں تک کہ ان کے پڑوسی اور اقرباء تک کو شامل کردیا۔“
(القول البدیع ت محمد عوامہ: 273، حدیث نمبر: 37)

روایت پر تبصرہ: اس روایت پر میں کیا تبصرہ کروں خود امام سخاوی رحمہ اللہ نے اس روایت کو ذکر کرنے کے بعد فرمایا: 
«رواه أبو موسى المديني بسند ضعيف»
”اس روایت کو ابو موسی المدینی نے ضعیف سند کے ساتھ روایت کیا ہے۔“

چوتھا اعتراض: چشتی صاحب کہتے ہیں کہ:
”غیر مقلدین نے سنن نسائی کی سجدوں میں رفع الیدین والی حدیث کی سند میں تحریف کی اور جب ”دار السلام“ سے اس کتاب کو چھاپا تو ”شعبہ“ کے بجائے ”سعید“ کر دیا۔ مزید کہتے ہیں کہ غیر مقلدین کے محدث البانی نے اس حدیث کی تصحیح کی ہے۔"
جواب: درحقیقت یہ اعتراض کم علمی اور تعصب کی بنا پر کیا جا رہا ہے ”شعبہ“ کے بجائے ”سعید“ ذکر کرنا  تحریف نہیں تحقیق ہے۔ اور اگر ان کے نزدیک یہ تحریف ہے تو ان کے مطابق مندرجہ ذیل محدثین بھی تحریف کے مرتکب ہوئے ہیں: 
⓵ ابن ابی عدی سے یہی روایت احمد بن حنبل رحمہ اللہ نے سعید بن ابی عروبہ کی سند سے نقل کی ہے۔ 
(مسند احمد ط الرسالۃ حدیث نمبر: 15600، 15604)

⓶ ابن ابی عدی سے محمد بن المثنی کی روایت امام مسلم نے سعید بن ابی عروبہ کی سند سے نقل کی ہے۔ 
(صحیح مسلم، حدیث نمبر: 391)

⓷ یہی روایت اسی سند و متن کے ساتھ امام نسائی کی ”السنن الکبری“ میں «سعید عن قتادہ» کی سند سے موجود ہے۔ 
(سنن الکبری للنسائی ط الرسالۃ: 1/343، حدیث نمبر: 676)

یہ اس بات کی بہت بڑی دلیل ہے کہ ”سنن نسائی“ میں ناشر یا کاتب کی غلطی کی وجہ سے «سعید عن قتادہ» کے بجائے «شعبہ عن قتادہ» ہوگیا۔

⓸ ابن حزم نے ”المحلی“ میں اپنی سند کے ساتھ امام نسائی رحمہ اللہ سے یہ حدیث نقل کی ہے اور اس میں «سعید بن ابی عروبہ» کا نام ہے۔
(المحلی بالآثار ط دار الفکر: 3/8)

⓹ حافظ ابن حجر رحمہ اللہ نے ”فتح الباری“ میں یہ روایت نسائی سے «سعید بن ابی عروبہ» کی صراحت سے نقل کی ہے۔ 
(فتح الباری لابن حجر ط دار المعرفۃ: 2/223)

⓺ امام طحاوی حنفی رحمہ اللہ نے یہی روایت امام نسائی رحمہ اللہ سے ”سعید“ کی سند سے نقل کی ہے۔ 
(مشکل الآثار ط الرسالۃ: 15/57، حدیث نمبر: 5837)

⓻ امام بیہقی رحمہ اللہ نے ”محمد بن المثنی“ والی روایت ”سعید“ کی سند کے ساتھ نقل کی ہے۔
(السنن الکبری للبیہقی ط دار الکتب العلمیۃ: 2/39، حدیث نمبر: 2307)

تنبیہ: یہ روایت سجدوں کے رفع الیدین کے ذکر کے ساتھ شاذ ہے۔ تفصیل کے لئے دیکھیں مسند احمد ط الرسالۃ۔

آخر میں بس اتنا کہوں گا کہ انسان کو تعصب میں اس قدر نہیں بڑھ جانا چاہئے کہ فریق مخالف پر بلا وجہ تحریف جیسے الزامات لگائے اور اس میں اتنا بڑھ جائے کہ جھوٹ، بہتان اور تدلیس کا سہارا لینے لگے۔ آپ اس تحریر میں چشتی صاحب کی عادت دیکھ سکتے ہیں کہ کیسے وہ اپنی بات کو ثابت کرنے کے لئے جھوٹ اور تدلیس کا سہارا لے رہے ہیں۔ یہ ہم کو کہتے ہیں کہ غیر مقلدین کو عربی سے کوئی سروکار نہیں ہوتا حالانکہ چشتی صاحب خود عربی عبارت تک نہیں پڑھ پاتے اور حد تو یہ ہے کہ حدیث پڑھنے میں غلطی کرتے ہیں۔ اگر میں انکی ان حرکتوں پر کچھ لکھنے بیٹھوں گا تو پھر بات لمبی چل نکلے گی۔ لہذا بس اسی پر اکتفاء کرتا ہوں اور اللہ سے دعا کرتا ہوں کہ اللہ حق بات کہنے، سننے، سمجھنے اور اس پر عمل کرنے کی توفیق عنایت فرمائے۔ آمین

Sunday, December 16, 2018

کیا عورت اپنے ساتھ چار مردوں کو جہنم میں لے کر جائے گی؟

کیا عورت اپنے ساتھ چار مردوں کو جہنم میں لے کر جائے گی؟؟؟


سوال: السلام علیکم و رحمۃ اللہ وبرکاتہ
میرا سوال یہ ہے کہ ایک حدیث بہت سننے میں آتی ہے کہ ”ایک عورت چار مردوں کو جہنم میں لے جائے گی۔“
یہ حدیث صحیح ہے یا ضعیف؟؟؟

جواب: وعلیکم السلام ورحمۃ اللہ وبرکاتہ
یہ روایت ان الفاظ کے ساتھ بیان کی جاتی ہے:
إذا دخلت امرأة إلى النار أدخلت معها أربعة، أباها وأخاها وزوجها وولدها
”جب عورت جہنم میں داخل ہوگی تو اپنے ساتھ چار لوگوں کو جہنم میں لے کر جائے گی:
اپنے باپ کو، اپنے بھائی کو، اپنے شوہر کو اور اپنے بیٹے کو۔“
کچھ لوگ اس روایت کو حجاب کے ساتھ ذکر کرکے بیان کرتے ہیں:
أربعة يُسألون عن حجاب المرأة: أبوها، وأخوها، وزوجها، وابنها
”چار لوگوں سے عورت کے حجاب کے متعلق سوال کیا جائے گا:
اس کے باپ سے، اس کے بھائی سے، اس کے شوہر سے اور اس کے بیٹے سے۔“
اس معنی کی کوئی بھی صحیح یا ضعیف روایت مجھے نہیں مل سکی۔ اور متعدد باحثین اور محققین نے اس بات کی صراحت کی ہے کہ اس روایت کی کوئی اصل نہیں ہے۔
مزید یہ کہ یہ روایت شریعت کے اس اصول کے خلاف ہے کہ کوئی شخص دوسروں کے گناہوں کے عوض جہنم میں داخل ہو۔ چنانچہ فرمان باری تعالی ہے:
وَلَا تَكْسِبُ كُلُّ نَفْسٍ إِلَّا عَلَيْهَا وَلَا تَزِرُ وَازِرَةٌ وِزْرَ أُخْرَى
”اور جو شخص بھی کوئی عمل کرتا ہے وه اسی پر رہتا ہے اور کوئی کسی دوسرے کا بوجھ نہ اٹھائے گا۔“
(سورۃ الانعام: 164)

اور نبی ﷺ کا فرمان ہے:
أَلَا لَا يَجْنِي جَانٍ إِلَّا عَلَى نَفْسِهِ ، لَا يَجْنِي وَالِدٌ عَلَى وَلَدِهِ وَلَا مَوْلُودٌ عَلَى وَالِدِهِ
”خبردار! مجرم اپنے جرم پر خود پکڑا جائے گا، (یعنی جو قصور کرے گا وہ اپنی ذات ہی پر کرے گا اور اس کا مواخذہ اسی سے ہو گا) باپ کے جرم میں بیٹا نہ پکڑا جائے گا، اور نہ بیٹے کے جرم میں باپ۔“
(سنن ابن ماجہ: 2669، سنن ترمذی: 2159۔ قال الشيخ الألباني: صحيح)

اور سوال میں مذکور روایت کی تردید اس بات سے بھی ہوتی ہے کہ نوح اور لوط علیہما السلام کی بیویاں کافرہ تھی تو کیا ان کی وجہ سے نوح اور لوط علیہما السلام کو گناہ ملے گا؟؟؟
خلاصہ کلام یہ کہ سوال میں مذکور روایت بے اصل ہے۔ البتہ یہ بات یاد رکھیں کہ اپنے اہل وعیال کو جہنم سے بچانا ہر انسان پر واجب ہے۔ فرمان الہی ہے:
يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا
”اے ایمان والو! تم اپنے آپ کو اور اپنے گھر والوں کو آگ سے بچاؤ۔“
(سورۃ التحریم: 6)

اور نبی ﷺ کا فرمان ہے:
مُرُوا أَوْلَادَكُمْ بِالصَّلَاةِ وَهُمْ أَبْنَاءُ سَبْعِ سِنِينَ، وَاضْرِبُوهُمْ عَلَيْهَا وَهُمْ أَبْنَاءُ عَشْرٍ سِنِينَ، وَفَرِّقُوا بَيْنَهُمْ فِي الْمَضَاجِعِ
”جب تمہاری اولاد سات سال کی ہو جائے تو تم ان کو نماز پڑھنے کا حکم دو، اور جب وہ دس سال کے ہو جائیں تو انہیں اس پر (یعنی نماز نہ پڑھنے پر) مارو، اور ان کے سونے کے بستر الگ کر دو۔“
(سنن ابی داؤد: 495۔ قال الشيخ الألباني: حسن صحيح)

لہذا اگر وہ اپنی اس ذمہ داری کو پورا نہیں کرتا تو بروز قیامت ذمہ داری ادا نہ کرنے کی بنا پر اس کی باز پرس اور پکڑ ہوگی۔ فرمان نبوی ہے:
أَلَا كُلُّكُمْ رَاعٍ وَكُلُّكُمْ مَسْئُولٌ عَنْ رَعِيَّتِهِ، ‏‏‏‏‏‏فَالْأَمِيرُ الَّذِي عَلَى النَّاسِ رَاعٍ وَهُوَ مَسْئُولٌ عَنْ رَعِيَّتِهِ، ‏‏‏‏‏‏وَالرَّجُلُ رَاعٍ عَلَى أَهْلِ بَيْتِهِ وَهُوَ مَسْئُولٌ عَنْهُمْ
”سن رکھو! تم میں سے ہر شخص حاکم ہے اور ہر شخص سے اس کی رعایا کے متعلق سوال کیا جائے گا، سو جو امیر لوگوں پر مقرر ہے وہ راعی (لوگوں کی بہبود کا ذمہ دار) ہے اس سے اس کی رعایا کے متعلق پوچھا جائے گا اور مرد اپنے اہل خانہ پر راعی (رعایت پر مامور) ہے، اس سے اس کی رعایا کے متعلق سوال ہو گا۔“ 
(صحیح مسلم: 1829)
واللہ اعلم بالصواب!

کتبہ: عمر اثری سنابلی